Gade w regade m - un poème de Léo Bien Aimé

Lè m ap gade w

m anvi regade w

pou m reve

gade lorizon

M anvi pran vwèl

Vole rive kote nyaj pa pwoche

Lè m ap gade w

Douvanjou enkyete

maske nan yon piwèt

Souke kò m ak kò w

Bay lannuit defi

Pou mennen lanmou ri pòt chanm

Lè m ap gade w

M anvi fwote

Fwote tout kò m nan mi

Fè madjigridji

Pou m regade w

K ap dangoye pòtre kannòt sezon gran van

Pòtre peyi depafini

Lè m ap gade w

Se timoun rebèl

K ap di lavi pa regade m

M pa gade w pou gade

Lè m gade w

kou laviwonndede

Se jiwèt gade pa bouleje

Lè m ap gade w

M anvi tounen gèp panyòl

Pou poze repoze sou podyòl

Lè m ap gade w se lavi k ap kouri pou jwèt lago kache

Se tibebe k ap kriye pou tete

Pou dlo je

Lè m ap gade w

Se lakansyèl k ap fè grimas

Kote lapli pa janm tonbe.